प्रबिधी > कृषि प्रबिधि > बृहतर धान उत्पादन कार्यक्रमले पर्सामा धान उत्पादन दोब्बर, किसानलार्इ बीमाको ब्यवस्थाले राहत

बृहतर धान उत्पादन कार्यक्रमले पर्सामा धान उत्पादन दोब्बर, किसानलार्इ बीमाको ब्यवस्थाले राहत

११ श्रावण ,२०७४ बुधवार । वीरगञ्ज। गत आर्थिक वर्षदेखि पर्सामा वृहतर धान उत्पादन कार्यक्रम लागु भएपछि किसानहरुको उत्पादन दुई गुणाले बढेको छ ।पहिले कठ्ठामा एक क्विन्टल उत्पादन हुनेमा हाल प्रतिकठ्ठा दुई क्विन्टल उत्पादन हुन थालेको कृषक समुहले बताएको छ । नमुना धान ब्लक कार्यक्रम सञ्चालन भएको पर्साको सखुवाप्रसौनी गाउँपालिका–१ सखुवनियाको कृषक समुहले धानको उत्पादन दुई गुणाले बढेको बताएको हो । कार्यक्रम सञ्चालनपछि अन्य किसान पनि बृहतर धान उत्पादन कार्यक्रमले निर्दिष्ट गरेको विधिबाट धान रोप्न आकर्षित भएको सागरमाथा कृषक समुहका अध्यक्ष राजेशप्रसाद महतोले बताए । सगरमाथा कृषक समुहमा २५ जना किसानहरु रहेका छन् ।उनीहरुले १९ विघा ४ कठामा हर्दिनाथ–१ जातको चैते धान लगाएका थिए ।अहिले दोस्रो बालीको रुपमा सोना मन्सुली लगाएका छन् । समान दुरी र लाइनमा अर्थात ‘एसआरआई’ प्रविधिमा अधारित खेती गरिएकोले धानको उत्पादन बढेको अर्की किसान संगीता उप्रेतीले बताइन् । संगीताका अनुसार ६ कठ्ठामा उनले १२ क्विन्टल धान उत्पादन भएको सुनाइन् ।कार्यक्रम लागु भएपछि समुहले ५० हजार अनुदान पनि प्राप्त गर्न सफल भएको छ । समुहले धानको वीउमा ५० प्रतिशत अनुदान प्राप्त गर्दै आधुनिक धान रोपाई प्रविधि एसआरआई अंगालेको हो ।यस कार्यक्रम अन्तर्गत कुनै किसानले प्रति हेक्टरको धान बाली एक बाली अवधीको लागि एक लाख ६ हजारको विमाक रकमको कृषि विमा गरी १३ सय २५ रुपिया विमा शुल्क बुझायो भने जिल्ला कृषि विकास कार्यालय पर्साले प्रोत्साहन स्वरुप त्यो किसान वा समुहलाई ५ हजार अनुदान दिने गरेको व्यवस्था छ । यदि बाली सप्रेन वा नष्ट भयो भने नष्ट भएको बालीको कृषि प्राविधिकले गरेको लागत इष्टिमेटको ९० प्रतिशत क्षतिपूर्ती बीमा कम्पनीबाट पाउने प्रावधान छ ।कार्यक्रम अन्तर्गत बीमाको व्यवस्था पनि भएकोले किसानहरु लाभान्वित हुन थालेको जिल्ला कृषि विकास कार्यालय पर्साका प्रमुख वीरेन्द्र सिन्हाले बताए ।

views: 117


लोकप्रिय समाचार